اذا تواضع كنه يقهويك من حبل الوريد

[النـآدر]

اذا بغيت اشوف آخر ماتوصلّه القصيد
اطلّع الدفتر واناظر صورته وأصوّره

واذا بغيت اكتب قصيده ارمي الصوره بعيد
اخاف لاشفته وشفت البيت جنبه .. احقره

ازيد ويزيد وازيد وكل مازدته يزيد
الين اشوف ان كل شعري مالمس منه إشعره

اقوله يكفي خلاص يقول لي هل من مزيد !!
اقولها له اشكره ويقولها لي اشكره

اشقق الصفحه من الاحباط وابدأ من جديد
واناظر بوجهه واقول العفو عند المقدره

اعزم واروح له يعني على بالي شديد
واروحله مادام ماعندي شيءٍ اخسره

من دون معرفته احس الحب شيك بلا رصيد
وان حبني عز الله فداه السهر والمشوره

اللي لامنّه حضر يلين الراس العنيد
واللي لامنه طلع للناس يعمل شوشره

اذا سرح كنه يخطط على شيءٍ بعيد
وان ناظرك كنه يدلك طريق المقبره

إن كان ماله خلق لاعرفت بإسمك قال عيد
وإذا أشتهى حد جدّكـ التآسع عشر يتذكرهـ

اذا تواضع كنه يقهويك من حبل الوريد
وان شاف نفسه كن الارض كلها في يده كره

ان قال كلمه قال مره لايمكن يعيد
ماهوب راعي فلسفه ولايداني الثرثره

من خف دمه كنه يعاني نقصٍ في الحديد
كنه يقضي 24 ساعة غشمره

ان ضحك بـيّـن على ملامحك انك سعيد
كنه بيده فاتح فمك ولاهو مسكره

المشكله يدري باان حبه بوسط قلبي وحيد
بس المصيبه لاهو مقره ولاهو مستنكره

ان لمح ان حبه صعب بلمّـح ان حبي اكيد
وان قالها لي اشكره بااقولها لي اشكره

الشاعر / نواف الدبل

[المشرقي]

الشــــاعر / نـواف الدبـل

اسم صافح الشمـوخ والثقة بكل اعتزاز .. اسم يحتوي دنيـا الشعر وتحتويـه .
شاعرٌ متمكّـن شاعر تنساب من بين أحرفه أعذب المعاني .
ونقرأ في قصائده روحـه المحبوبة من الجميــع .

الشاعر / نـواف الدبـــل
شاعـر ينضم إلى كوكبة الشعـراء المتوهجين شهرة وتميّزاً

أخي الغالي - النادر
الذوق يتفنن في احضار الهدايا دائماً
وكانت هديتك مميّزة كالعادة
شكراَ لك.. ويعطيك العافيـة
لك ودي

[النـآدر]

فديتك أبو محمد والله يجبر بخاطرك ، إنت الذوق بكلماتك ..

[مازن الشهراني]

شاعر أول مره أسمع فيه .. وأعلم أنك يالنادر لم تروق لك هذه القصيده إلا من منبع ذوقك الرائع ..

بعد ذلك قرأت القصيده ورأيت فيها من الإبداع والبدع الرائع مالله به عليم ..
أشكرك يالنادر