سلال اللوعة
مشاعر .. كان ميلادها تلك الدموع الغالية على قلبي والمتناثرة من عينيّ إبنتي ( تغريد ) على إثر حلم ٍ أخافها
التفاصيل من خلال الأبيات المتواضعة التي تتابعت تفاعلا مع الحدث
تقبلوا موفور احترامي

قامت من النوم تبكي .. قلت مكتوب خير=يا الله دخيلك من اللوعات وسلالها
ادري بها يوم تقبل عالخلايق تغير=في حزة ٍ ترسي الخيره على جالها
وقفت عند الغلا وانا بقلب ٍ كسير=واستجدي الصبر .. همّي تهدئة بالها
بادرت أسولف لها بلسان طفل ٍ صغير=اعيد لهو الطفوله في تخيّالها
لهو التأمل وبسمات السرور المثير=حتى مع قسوة الدنيا وغربالها
قدرت بعناية الربّ العزيز القدير=أحدّ الاسباب وامحي بصمة افعالها
مسحت دمع العيون اللي يهزّ الضمير=وارتحت للبسمة اللي جات من حالها
كلمه وبسمه إلين تبدّل الجو غير=وحينها قلت فرصه لازم اسالها
تغريد .. يا بوك وش سر ّ الهطول الغزير ؟=بدموعك اللي لها بالقلب مثقالها
افداك وافدا عيونك كلما تستدير=الله يجعل سرور الوقت منوالها
ردت بصوت ٍ يذرّي به شهيق وزفير=وبنبرة ٍ حزنها يبدي من خلالها
قالت تحلّمت في نومي بحلم ٍ خطير=حلوم يا بوي فال الله ولا فالها
شفتك توفيت يا الغالي وقمت استجير=فرقاك يا بوي كيف أقوى تحمّالها
قلت اهدي اهدي وشوفيني بكبر البعير=وإرادة الله لها بالعدل مرسالها
هو المحي المميت هو العليم الخبير=هو خالق الخلق أجل ومحدد آجالها
جعل من الموت سنّه في الحياة ومصير=قدر مقدّر على الأزمان واجيالها
لو متّ يا بوك عادي والمقدّر يصير=الروح لا بد يلفي يوم ترحالها
الحكم نافذ ولا يعرف صغير وكبير=ولا يميّزضعاف الناس وابطالها
والعمر مهما يطول من أوله للأخير=نهايته في ظروف الغيب يشتالها
آجال والحيّ ما له خيرة ٍ يستخير=ولا رجا حيلة ٍ بالمكر يحتالها
الحكم للواحد المعبود نعمه وخير=يالله دخيلك من اللوعات وسلالها