جيت المكان اللي قبل عام جيته
. . . . . . جيـته أدوّر بــه بقــايـــا حنيـــنه
مدري وش اللي صار لكن فديته
. . . . . .قبل اقتــرب صـــوّت ياعــا رفيـــنه
سألت جاره قال هذاك بيته
. . . . . .قلت أسألك عن صاحب البيت وينه
قال العذر عامين ماذاع صيته
. . . . . . والله مـــــدري وين راحت سنيــنه
وعوّدت هايم منقهر مالقيته
. . . . . . والهــم زاد وزاد قلبــــــي ونيـنه
تكسّر الخاطر مثل ماهقيته
. . . . . . مثــل الـــزجاج وبالحجر حاذفيـــنه
ياعاذلي كف العذل مانسيته
. . . . . . رافض نصــايحكم ولوهــــي ثميـنه
لوهي على كيفي شراعي طويته
. . . . . . وابعـــدت عن داره وشينه وزيـنه
ياعـــــاذلي ياليتــني ماهويته
. . . . . . ولا تكوّن حـــب بيــــــني وبيــــنه
ولا حلفت ومن عهودي عطيته
. . . . . . ولاعطــــاني خــاتمه من يميـــنه
ولارجــــاني ثم بعــده رجيته
. . . . . . ولا على صدره يدي في يديـــــنه
ولا سقاني من هواه وسقيته
. . . . . . ليته جفــانــي او جفيــته بحيـــنه
ياما سهرت الليل ياما أحتريته
. . . . . . ياما على كفي نزل دمع عيـــــنه
ياما سألته وش حصل وأحتويته
. . . . . . حتى هدأ وأشرق بعيني جبيـنه
يالايمي قبلك خفوقـــــي نهيته
. . . . . . عيـّا يوافقني عسى الله يعيـــــنه