يامرحبـا يامعنَّـى خـط الأقـلامِ
مثايـلٍ شوَّقتنـي فــي معانيـهـا
حي المثايل ياسلالـة نسـل الكـرام
يامن بيوتـه عـن الـزلاَّت يحميهـا
من داثر الوقت وهذا طبـع الايَّامـي
مرَّات تصفى ومرَّات الكـدر فيهـا
كم واردٍ ضاميٍ صد درب الاحيامي
وكم واردٍ شرب من صافي مغانيهـا
لاتنظر الَّلي مضـى وتعـد الايَّامـي
أرعى ربيـع الزَّمـان أول لياليهـا
حلو الَّليالـي تعـوَّض مـر الايَّامـي
مايحسب الوقت ويفكَّر في ماضيهـا
لو كان مابي كتبته جفَّـت أقلامـي
من حرَّتـي أبـدع أمثالـي وأغنَّيهـا
ردار فكري يصوَّر لي مضـن زامـي
في هندس الَّليل يوم أرتـاح غافيهـا
يوم الخلايـا تِنـام وفكرهـا نـامِ
حرام عينـي لذيـذ النَّـوم يغفيهـا
حالي كما عشب صيفٍ صابه الضَّامي
وإلا كمـا وردةٍ جفَّـت نواديـهـا
نار الغضى والتوقَّد في بحـر طامـي
خالـد وعيَّـا مولَّعهـا يطفَّيـهـا
ريمٍ رعى في الفياض وزهر الأوسـامِ
قايد خشوف الجوازي فـي مِفاليهـا
بأرض المحيله ولـو تاطاهـا الأقـدامِ
تِزهى وتِضحك لها الدَّنيـا ومافيهـا
سود الَّليالي مـع سالفـات الايَّـامِ
نأخـذ مجازمهـا ونتـرك لياليـهـا
نمشي على درب ماتاطـاه الاقـدامِ
وإن وعرت الأرض يعجبني المشي فيها
ياخوي أنا ريت رويان وهو ضامـي
ياكيف عطشان في جاري سواقيهـا
ريَّح ضميرك ولو هيَّم بـك هيامـي
حقاً على الَّلي جرح نفسك يداويهـا
يامفطر الوقت هذا شهـر الصَّيامـي
وليلـة القـدر فـي آخـر لياليهـا
يازين هدَّ الوحـش بعـض الايَّامـي
في ديـرةٍ قفـرةٍ عسـره مضاويهـا
أشقر طويل المعنَّق يبـري العظامـي
صوايده مِن فنادي الصَّيـد يدميهـا
ياشيـخ هـذا زمـانٍ كلِّـه انعـامِ
الذيب جايـع وشبعانـه حصانيهـا
لو كان يبغـى يغـزَّر نابـه الدَّامـي
ياكيف تكسر جوارحهـا ظواريهـا
وكل مخلوق في الدَّنيـا فـلا دامـي
لابـد تنهـي مغازلهـا مطاويـهـا
وآخر كلامي بحرف السيـن والـلامِ
والميـم والعيـن تِتلاهـا قوافيـهـا
الشيخ محمد بن راشد ال مكتوم